राजविराज, ३ मंसिर । संयुक्त लोकतान्त्रिक मधेशी मोर्चाको विहीवार बसेको बैठकले आन्दोलनलाई थप सशक्त बनाउने निर्णय गरेको छ ।
संघीय समाजवादी फोरम नेपालको सिंहदरबार स्थित संसदीय दलको कार्यालयमा संयुक्त लोकतान्त्रिक मधेशी मोर्चाको बैठकले वर्तमान राजनीतिक परिस्थिति, जारी मधेशसहित विभिन्न आन्दोलन र वार्तालगायतका विषयहरुमा गम्भीर छलफल गरी ७ बुँदे निर्णय सार्वजनिक गरेको छ । मधेशी, आदिवासी, जनजाति, थारु, मुस्लिम, दलितलगायत सिमान्तकृत समुदायहरुले उठाएका मुद्दाहरुलाई वार्ताद्वारा सम्बोधन गर्न सरकार एवम् तीन दल नेपाली कांग्रेस, एकिकृत नेकपा माओवादी र नेकपा एमाले गम्भीर नरहेको भन्दै जारी आन्दोलनलाई अझ सशक्त रुपले जारी राख्ने निर्णय भएको छ ।
आन्दोलनलाई थप सशक्त एवम् प्रभावकारी बनाउन यातायात, बजार, कलकारखाना बन्द गर्नुकासाथै सिमानाका र राजमार्ग अवरुद्ध गर्ने कार्यक्रमलाई निरन्तरता दिने निर्णय गरियो । मंसिर ५ गतेदेखि राजमार्ग अवरुद्ध लगायतका कार्यक्रमहरुलाई निरन्तर जारी राख्ने निर्णय भएको मोर्चाद्वारा जारी विज्ञप्तिमा जनाइएको छ ।
मंसिर ६ गते प्रमुख सहर बजारहरुमा मशाल जुलुस प्रदर्शन गर्ने, आन्दोलन जारी भएको १००औं दिन अर्थात मंसिर ७ गते सोमवार दिनको १ बजे वीर अमर शहीदहरुप्रति श्रद्धाञ्जली अर्पण गर्न तराई मधेश लगायत देशका विभिन्न ठाउँका चौक–चौराहाहरुमा आमजनसमुदायको सहभागितामा स–परिवारसहित पाँच मिनेट मौनधारण गर्ने मोर्चाले निर्णय गरेको छ ।
विद्यालय, क्याम्पसहरुलाई विहानको समयमा कक्षा सञ्चालन गर्ने गरी पठनपाठन सुचारु गर्ने, विरामीहरुको स्वास्थ्य उपचारलाई गम्भीरतापूर्वक लिई मानवताको नाताले औषधी, अक्सिजन र स्वास्थ्य सम्वन्धि उपकरणहरुलाई दिनको समयमा मात्र बिराटनगर सिमानाकाबाट ल्याउन दिने र सो कार्यलाई सहयोग गर्ने निर्णय गरिएको संघीय समाजवादी फोरम नेपालका अध्यक्ष उपेन्द्र यादव, तराई मधेश लोकतान्त्रिक पार्टीका अध्यक्ष महन्थ ठाकुर, सद्भावना पार्टीका सह–अध्यक्ष लक्ष्मणलाल कर्ण र तराई मधेश सद्भावना पार्टीका अध्यक्ष महेन्द्र राय यादवद्वारा जारी विज्ञप्तिमा जनाइएको छ ।