न्यूज टुडे
राजबिराज, २६ असोज ।
सप्तरीको सप्तकोशी नगरपालिका ५ स्थित गंगाजलीमा कार्तिक ६ गते तय भएको सहिद दिलिप स्तम्भ अनाबरण एवम् सहिद दिलिप स्मृति पत्रकारिता पुरस्कार बितरण कार्यक्रम सरेको छ । सहिद दिलिप प्रतिष्ठानका अध्यक्ष राज कुमार लेखीले कार्यक्रम एक दिन अगाडि कार्तिक ५ गते सारिएको जानकारी गराएको हो ।
प्रतिष्ठानले दिलिप स्मृति स्तम्भ अनावरण तथा दिलिप स्मृति पत्रकारिता पुरस्कार कार्तिक ६ गते गर्ने तय गरेको थियोे । कार्यक्रमको मिति एक दिन अगाडि सारिएको छ, प्रतिष्ठानका अध्यक्ष लेखीद्वारा जारी सूचनामा भनिएको छ, सहिद दिलिप स्तम्भ अनावरण एवम् सहिद दिलिप स्मृति पत्रकारिता पुरस्कार बितरण समारोह कार्तिक ५ गते सार्ने निर्णय भएको जानकारी सबैमा गराउन चाहन्छु ।
सहिद दिलिप प्रतिष्ठानले सहिद दिलिप चौधरीको स्मृतिमा सप्तरीको सप्तकोशी नगरपालिका ५ गंगाजलीमा स्तम्भ निर्माण गरि कार्तिक ५ गते अनावरण कार्यक्रम तय गरेको छ । सोही कार्यक्रममा समानता र न्यायको लागि कलम चलाउने तीन जना पत्रकारलाई सम्मान गर्ने कार्यक्रम रहेको प्रतिष्ठानले जनाएको छ । पुरस्कारको राशी जनही ११ हजार रहेको छ । सप्तरीको तत्कालीन फत्तेपुर गाबिसमा जन्मिएका सहिद दिलिप चौधरी बि.सं. २०४२ सालमा बम काण्डको आरोपमा काठमाडौंस्थित ल क्याम्पसबाट पक्राउ परेका थिए ।
पक्राउ परे लगत्तै उनको हत्या गरिएको थियोे । सहिद चौधरी मञ्चायती ब्यबस्थाको बिरुद्ध बि.सं. २०३६ सालमा सप्तरी जिल्लाको फत्तेपुर–कंचनपुर क्षेत्रमा भएको बिद्यार्थी आन्दोलन तथा गणतन्त्र नेपाल प्राप्तिको लागि २०४२ सालको देशब्यापी भएको बम काण्डको अगुवाई गरेका थिए ।