उत्तम आचार्य
राजबिराज , २०असोज ।
स्थानीय तहको निर्वाचन आगामी फागुनभित्र गराउने विषयमा चर्चा चलिरहेका बेला सप्तरीको कञ्चनरुप नगरपालिकामा चुनावी सरगर्मी बढ्न थालेको छ। विशेषगरी नेकपा एमालेभित्र मेयर पदका सम्भावित उम्मेदवारका रूपमा विभिन्न नेताहरूको नाम चर्चामा आउन थालेपछि स्थानीय राजनीतिक माहोल थप तातिएको हो ।
नेकपा एमालेबाट कञ्चनरुप नगरपालिकाको मेयर पदका लागि पूर्वमेयर वसन्त मिश्र, राजकुमार साह र मनिष श्रेष्ठको नाम चर्चामा रहेको छ। यीमध्ये पूर्वमेयर वसन्त मिश्रको नाम पछिल्लो समय चर्चाको अग्रपंक्तिमा देखिएको छ।
विद्यार्थी जीवनदेखि नै राजनीतिमा सक्रिय मिश्रले पार्टी संगठनमा विभिन्न जिम्मेवारी सम्हाल्दै आएका छन्। उनले सप्तरी क्षेत्र नम्बर १ को इन्चार्ज, जिल्ला कमिटी सदस्यलगायतका जिम्मेवारी सम्हालिसकेका छन् भने हाल नेकपा एमाले मधेस प्रदेश कमिटी सदस्यका रूपमा सक्रिय छन्। उनी कञ्चनरुप नगरपालिकाका पूर्वमेयरसमेत हुन्।
पार्टीभित्र लामो समयदेखि सक्रिय रहेका मिश्रलाई इमानदार, त्यागी र संगठनप्रति प्रतिबद्ध नेताका रूपमा चिन्नेहरू छन्। नगरपालिकाको नेतृत्व गरिसकेको अनुभवसमेत रहेकाले आगामी निर्वाचनमा उनको दाबेदारीलाई अर्थपूर्ण रूपमा हेरिएको छ।
त्यसैगरी एमालेभित्र राजकुमार साह र मनिष श्रेष्ठको नाम पनि मेयर पदका सम्भावित उम्मेदवारका रूपमा चर्चामा रहेको छ। तीनै जना नेताका पक्षमा पार्टीभित्र आ–आफ्नो राजनीतिक आधार र समर्थक रहेको बताइन्छ। उम्मेदवार छनोटका क्रममा उनीहरूको संगठनात्मक योगदान, जनसमर्थन, राजनीतिक सक्रियता तथा स्थानीय तहमा प्रभावलाई समेत आधार बनाइने अपेक्षा गरिएको छ।
एकै पदका लागि तीन जना आकांक्षीको नाम चर्चामा आएसँगै कञ्चनरुप नगरपालिकामा एमालेभित्रको आन्तरिक राजनीतिक समीकरणसमेत चासोको विषय बनेको छ। पार्टीले कसलाई उम्मेदवार बनाउने भन्ने विषयमा अहिले नै अन्तिम टुंगो लागिसकेको छैन।
निर्वाचनको मिति नजिकिँदै जाँदा सम्भावित उम्मेदवारहरूले आफ्नो राजनीतिक सक्रियता बढाउने तथा कार्यकर्ता र स्थानीय मतदातासँगको भेटघाटलाई तीव्रता दिने क्रमसमेत बढ्ने देखिन्छ। त्यससँगै कञ्चनरुपमा एमालेबाट मेयरको टिकट कसले पाउँछ भन्ने विषय स्थानीय राजनीतिक वृत्तमा चासोको विषय बनेको छ।
यद्यपि, वसन्त मिश्र, राजकुमार साह र मनिष श्रेष्ठको नाम अहिले सम्भावित दाबेदारका रूपमा मात्र चर्चामा रहेको हो। उम्मेदवार छनोटसम्बन्धी अन्तिम निर्णय भने पार्टीको आधिकारिक प्रक्रिया र सम्बन्धित कमिटीको निर्णयबाट हुने छ।
एमालेले उम्मेदवारको टुंगो लगाएसँगै कञ्चनरुप नगरपालिकाको आगामी स्थानीय निर्वाचनको राजनीतिक प्रतिस्पर्धाले थप रोचक मोड लिने देखिएको छ।