उत्तम आचार्य
कञ्चनरुप,३० साउन ।
मधेश प्रदेश सरकारका पूर्व गृह, सञ्चार तथा कानुन मन्त्री राजकुमार लेखीले वर्तमान सरकार संघीयता समाप्त पार्ने खेलमा लागेको आरोप लगाएका छन् । कञ्चनरुप नगरपालिका वडा नम्बर ७ स्थित आदर्श टोलमा नवनिर्मित सामुदायिक भवनको शनिबार उद्घाटन गर्दै पूर्वमन्त्री लेखीले यस्तो बताएका हुन्।
नवनिर्मित भवन उद्घाटन गर्दै पूर्वमन्त्री लेखीले वर्तमान सरकारले सञ्चार क्षेत्रदेखि राज्यका हरेक पक्षलाई कमजोर बनाउने अभियान चलाएको आरोप लगाए । सरकारका यस्ता गलत र निरंकुश कदमविरुद्ध सम्पूर्ण नागरिक, सञ्चारकर्मी र राजनीतिक दल एकजुट भएर अगाडि बढ्नुपर्नेमा उनले जोड दिए ।
मधेश प्रदेश सरकारको आर्थिक वर्ष २०८२/२०८३ को बजेटबाट विनियोजित २० लाख रुपैयाँको लागतमा उक्त सामुदायिक भवन निर्माण कार्य सम्पन्न भएको हो।
पूर्वमन्त्री लेखीकै विशेष पहल र सक्रियतामा उक्त बजेट क्षेत्रमा भित्रिएको विष्णु पाञ्चायन मन्दिरका सह-सचिव राजेन्द्र कोइरालाले बताए। भवन निर्माण सम्पन्न भएसँगै स्थानीय स्तरमा सामाजिक तथा सांस्कृतिक गतिविधि सञ्चालन गर्न ठुलो टेवा पुग्ने भन्दै उन्ले खुशी व्यक्त गरे ।
विष्णु पाञ्चायन मन्दिरका अध्यक्ष द्वारिका प्रसाद भट्टराईको अध्यक्षतामा सम्पन्न भएको उक्त उद्घाटन कार्यक्रममा कञ्चनरुप नगरपालिकाका पूर्व नगर प्रमुख बसन्त मिश्र, स्थानीय समाजसेवी, बुद्धिजीवी, सञ्चारकर्मी तथा महिलाहरूको सहभागिता रहेको थियो।