न्यूज टुडे
राजविराज, १४ साउन ।
सिरहाको गोलबजारमा बिहीवार गोली लागेर एक बालकको मृत्यु भएको छ भने एक जना घाइते भएका छन् । सिरहाको तुलसीपुरका १५ वर्षीय गणेश यादवको मृत्यु भएको छ भने धनुषाको धारापानीका १९ वर्षीय सुभाष ठाकुर गम्भीर घाइते भएका हुन् ।
सुनसरी कप्तानगञ्जको घटनालाई लिएर गोलबजारमा बिहीबार बिहानैदेखि विरोध प्रदर्शन हुँदा तनाव सुरू भएको थियो । दुई पक्षबीच भएको तनावका क्रममा दुई युवकलाई गोली लागेको छ ।
झडपमा सिरहाको तुलसीपुरका यादव र धनुषाको धारापानीका ठाकुरलाई गोली लागेको प्रहरीले जनाएको छ । घाइते मध्ये यादव मृत्यु भएको जिल्ला प्रहरी कार्यालय सिरहाले जनाएको छ ।
सुभाषलाई गोलबजारमा प्राथमिक उपचारपछि थप उपचारका लागि धरान रिफर गरिएको छ । उनको अवस्था पनि गम्भीर रहेको घाइतेका परिवारले बताए ।
अहिले पनि तनावको स्थिति रहेकोले उनीहरूलाई कसले चलाएको गोली लाग्यो भन्ने कुरा खुल्न नसकेको तथा घटना बारे थप अनुसन्धान भइरहेको जिल्ला प्रहरी कार्यालय सिरहाले जनाएको छ ।
