न्यूज टुडे
राजविराज, ०४ मंसिर ।
सप्तरी प्रहरीले १७ क्वीन्टल ३६ किलो गाँजासहित एक जनालाई नियन्त्रणमा लिएको छ । जिल्ला प्रहरी कार्यालय सप्तरीद्वारा राजविराजमा मंगलबार पत्रकार सम्मेलन गर्दै गाँजासहि पक्राउ परेका व्यक्तिलाई सार्वजनिक गरेको हो ।
इलाका प्रहरी कार्यालय कल्याणपुरबाट प्रहरी निरीक्षक डम्बर विश्वकर्मा नेतृत्वका प्रहरी टोलीले गाँजासहित धनकुटा सहिद भुमि गाउँपालिका वडा नम्बर ३ बस्ने बर्ष ३३ को यमजित राईलाई नियन्त्रणमा लिएको सप्तरीका प्रहरी प्रमुख प्रहरी उपरीक्षक ढकेन्द्र खतिवडाले पत्रकार सम्मेलनमा जानकारी दिए ।
राजगढ गाउँपालिका वडा नम्बर ४ बेल्ही चपेना शनिमन्दिर स्थित भित्र सडकखण्डमा पत्थलगढाबाट झुटुकीतर्फ जाँदै गरेको को १ ख ६५०३ नम्बरको टिपरमा लोड गरि लादै गरेको ५६ बोरा लागूऔषध गाँजा फेला परेको उनले बताए ।
एसपी खतिवडाका अनुसार ढुङ्गा र बालूवामा मुनि लुकाएर ल्याएको गाँजाको तौल १७ क्वीन्टल ३६ किलो रहेको छ । पक्राउ परेको राई सोही टिपरको चालक रहेको एसपी खतिवडाले बताए ।
गाँजा र टिपर चालक राईलाई प्रहरीले नियन्त्रणमा राखी आबश्यक अनुसन्धान गरिरहेको एसपी खतिवडाले पत्रकार सम्मेलनमा जानकारी दिए ।
