शिवप्रसाद आचार्य
राजविराज, १३ असोज ।
सप्तरीको सप्तकोसी नगरपालिका वडा नम्बर ३ सखुबनी स्थित त्रियुगा नदीमा आइतबार बेबारिसे अवस्थामा एक वृद्वको शव फेला परेको छ । पहिचान खुल्न नसकेको अन्दाजी ६० /६५ वर्षको पुरुषको शव फेला परेको हो ।
प्रकृति हेर्दा गाउँघरमा मागी हिड्ने बाबाजी जस्तो देखिने केही दिन पहिले नै मृत्यु भएको हुन सक्ने तथा भर्खरको बाढीले बगाएर ल्याएको हुनसक्ने वडा नम्बर ३ का अध्यक्ष देवाकान्त गोजेवार बताए ।
त्रियुगा नदीमा बाढीले बगाएर ल्याएको दाउरा टिप्न गएका स्थानियले बिहान ७ बजे तिर देखेंपछि वडा अध्यक्षलाई खबर गरेका थिए।
शरीर गली सकेको हुनाले शव चिन्न सक्ने अवस्थामा नरहेकोले शवलाई अनुसन्धान पछि मात्र टुंगो लगाइने फत्तेपुर प्रहरी चौकीका प्रमुख प्रहरी नायव निरीक्षक पन्नालाल चौधरीले बताए ।
मृतकको घाँटीमा तुलसीको माला,हातमा कालो डोरो र कम्बरमा गम्छा बाँधिएको छ भने अनुहार चिनिने अवस्थामा नरहेको ,कंकाल मात्र बाकी रहेको उनले बताए ।स्थानीय मुचुल्का उठाएर शव परिक्षणका लागि राजविराज पठाइएको तथा घटना बारे थप अनुसन्धान भइरहेको प्रहरी नायव निरीक्षक चौधरीले जानकारी दिए ।