न्यूज टुडे
राजविराज, ०८भदौ ।
सप्तरीको हनुमाननगर कंकालिनी नगरपालिका-५ स्थित कोशी बाँधको सडकमा शनिबार मोटरसाइकल दुर्घटनामा परी एकजनाको मृत्यु भएको छ भने एकजना घाइते भएका छन् । दुर्घटनामा राजविराज नगरपालिका-१५ का ५२ वर्षीय विनोदकुमार साहको मृत्यु भएको हो ।
दुई मोटरसाइकल एक आपसमा ठोक्किँदा एकजनाको मृत्यु भएको र अर्का एकजना घाइते भएको जिल्ला प्रहरी कार्यालय सप्तरीले जनाएको छ ।
भारदहबाट हनुमाननगरतर्फ आइरहेको स २ प ७२९६ नम्बरको मोटरसाइकल र विपरीत दिशाबाट गइरहेको को ३४ प ५४५९ नम्बरको मोटरसाइकल हनुमाननगर कंकालिनी नगरपालिका-५ स्थित कोसी बाँधमा बिहान १०: ४५ बजे एक आपसमा ठोक्किएका थिए । दुर्घटनामा स २ प ७२९६ नम्बरको मोटरसाइकल चालक साहको घटनास्थलमै मृत्यु भएको प्रहरीले बताएका छन् ।
अर्को मोटरसाइकल चालकको पहिचान नखुलेको र घाइते अवस्थामा सिटी रिक्सामा चढी भारदहतर्फ गएको सुचना प्राप्त भएकोले खोजी भइरहेको जिल्ला प्रहरी कार्यालय सप्तरीले जनाएका छन् ।