न्यूज टुडे
राजविराज, २४ साउन ।
मोटरसाइकलको ठक्करबाट ज्यान गुमाएका सप्तरीको अग्नीसाईर कृष्णासवरन गाउँपालिका १ स्थित ठाकुरजी मावि डिप्लोमा इन्जिनियरिङ कलेज जण्डोलमा अध्यनरत छात्र स्वर्गीय ध्रुव कुमार मण्डलको स्मृतिमा श्रद्धाञ्जली सभाको आयोजना गरिएको छ । छैठो सेमेस्टरमा अध्यनरत छात्र स्वर्गीय मण्डलको स्मृतिमा डिप्लोमा इन सिभिल इन्जिनियरिङ कलेजले बिहीबार श्रद्धाञ्जलीसभा आयोजना गरेको हो ।
कलेजका कोर्डिनेटर पन्चदेव चौधरीको अध्यक्षतामा आयोजित श्रद्धाञ्जलीसभामा कलेजका प्राध्यापक, शिक्षक, स्थानीय राजनीतिक दलका प्रतिनिधि, कलेजमा अध्यनरत छात्रछात्राहरुले स्वर्गीय मण्डलको तस्वीरमा फुलमाला अर्पण गरी श्रद्धाञ्जली व्यक्त गरे ।
कार्यक्रममा कलेजका कोर्डिनेटर चौधरी, शिक्षक श्याम चौधरी, नेपाली काँग्रेस अग्नीसाईर कृष्णासवरन १ का वडा सभापति नन्दीलाल चौधरी, इन्जिनियर शिव कुमार यादव, इन्जिनियर रुवेन चौधरी, सव-इन्जिनियर पर्शुराम माझी, सन्तोष चौधरीलगायतले शोक मन्तव्य व्यक्त गर्दै एक होनहार, इमानदार र दक्ष जनशक्ति गुमाउनु परेको भन्दै गहिरो दुख व्यक्त गरे ।
सप्तरीको शम्भुनाथ नगरपालिका १० जमुवा घर भएको २१ बर्षिय छात्रको साउन २१ गते मोटरसाइकलको ठक्करबाट मृत्यु भएको थियो । कठौना- पातो सडक खण्ड अन्तर्गत घर नजिकै कलभर्टमा बसिरहेका बेला मोटरसाइकलको ठक्करबाट गम्भीर घाइते मण्डल स्थानीय अस्पतालमा उपचारको क्रममा मृत्यु भएको मृतकका परिवारले जनाएको छ ।