न्यूज टुडे
राजविराज, २६ माघ ।
उपराष्ट्रपति रामसहय यादवले तामाङ समुदायको राष्ट्रिय सांस्कृतिक पर्व सोनाम ल्होछारको अवसरमा शुभकामना व्यक्त गरेका छन् । उपराष्ट्रपति यादवद्वारा शुक्रबार एक शुभकामना संदेश जारी गर्दै ल्होछार पर्वको शुभकामना व्यक्त गरेका हुन् ।
हरेक वर्षको माघ शुक्ल प्रतिपदाका दिन तामाङ लगायतका समुदायले अत्यन्तै हर्षोल्लासका साथ मनाउने महान पर्व सोनाम ल्होछारको सुखद उपलक्ष्यमा स्वदेश तथा विदेशमा रहनु भएका सम्पूर्ण नेपाली दिदीबहिनी तथा दाजुभाइहरुमा सुख, शान्ति, समृद्धि र सुस्वास्थ्यका लागि हार्दिक मंगलमय शुभकामना व्यक्त गर्दछु, उपराष्ट्रपति यादवद्वारा जारी शुभकामना संदेशमा भनिएको छ ।
“भूमिपूजा, कूलपूजा एवम् दानदक्षिणा, ढोगभेट, नाचगान, मिठो परिकार बनाएर खाने र शुभकामना आदानप्रदान गरी यो पर्व मनाउने चलन छ, उपराष्ट्रपति यादवद्वारा जारी संदेशमा अभिएको छ, समुदायका सबै जना एकै ठाउँमा भेला भई सामूहिक रुपमा मनाइने यो पर्व मुलुकका विभिन्न भूभागमा बसोबास गर्ने तामाङसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा लगायतले आ–आफ्नो परम्परा अनुसार मनाउँछन् । नेपालको मौलिक संस्कृति र सांस्कृतिक सम्पदाको संरक्षण र प्रवर्धन गर्न सोनाम ल्होछारले सहयोग पुग्ने विश्वास व्यक्त गर्दछु ।”
सोनाम ल्होछारले सम्पुर्ण नेपालीलाई जोड्ने काम गरेको भन्दै उनले नेपालको राष्ट्रिय भावनालाई थप मजबुत बनाउन सहयोग गर्ने विश्वास व्यक्त गरेका छन् ।
“नेपालको संविधानले गणतन्त्र, संघीयता, समानता, समावेशिता, धर्मनिरपेक्षता र कानूनी राज्यलाई अंगीकार गरेको छ । हाम्रो गणतन्त्रात्मक संवैधानिक व्यवस्था प्रणालीले बहुजाति, बहुभाषा, बहुसंस्कृति, बहु–वेशभूषा आदिलाई संरक्षण गर्दै सबै क्षेत्र, भूगोल, धर्म, समुदाय र संस्कृतिलाई परस्पर जोड्ने काम गरेको छ, शुभकामना संदेशमा भनिएको छ, भूगोल, क्षेत्र, वर्ग र समुदाय अनुसार चाडपर्वहरुमा विविधता रहेको पाइन्छ । हाम्रो सामाजिक विविधताभित्र सुदृढ र प्रगाढ एकताले नेपालको राष्ट्रिय भावनालाई थप मजबूत बनाउन सहयोग पुगेको छ । आपसी रीस, राग, वैमनस्यता, उच्छृंखलता, द्वन्द्व र द्वेष बिर्सेर परस्पर खुशी र उल्लास साटासाट गर्न सोनाम ल्होसार पर्वले सबैलाई उत्प्रेरित गरोस् । “
सोनाम ल्होछारले समुदाय, समाज र देशमा सामाजिक एकता, परस्पर विश्वास, सहयोग, मैत्रीभाव, भाइचारा, मेलमिलाप, आदर, सम्मान र सद्भाव कायम गर्दै मुलुकलाई एकताको सूत्रमा बाँध्दै राष्ट्रिय एकता, अखण्डता, सार्वभौमिकता र राष्ट्रियतालाई बलियो बनाउँदै मुलुकलाई समृद्धितर्फ उन्मुख गराउन सम्पूर्ण नेपालीलाई उत्प्रेरित गर्न सकोस् भन्ने शुभकामना व्यक्त गर्दछु, जारी शुभकामना संदेशमा भनिएको छ ।
