राजविराज, ३० असोज। सप्तरीका विभिन्न स्थानीय तहका २८ परिवारलाई स्वरोजगारीका लागि आर्थिक सहयोग प्राप्त भएको छ ।
बोदेबर्साईन नगरपालिका– ५ का दुई परिवारलाई बाख्रा पालन, दुई परिवारलाई गाईपालन, एक परिवारलाई भैंसी पालन, एक परिवारलाई कस्मेटिक पसल र एक परिवारलाई सिलाई कटाई पसल संचालनका लागि प्रति परिवार ३० हजारका दरले सहयोग प्राप्त भएको हो । वाँकी रकम भने सम्वन्धित परिवार आफैले लगानी गर्नुपर्ने छ।
यसैगरी, राजविराज नगरपालिका– का १० परिवार र तिलाठी कोईलाडी गाउँपालिका –५ का ११ परिवारलाई पनि सोहि अनुपातमा सहयोग उपलब्ध गराईएको छ ।
वादेवरसाईन नगरपालिका ५ मा आयोजित एक कार्यक्रममा बोदेबर्साईन नगरपालिका–५ वडा अध्यक्ष मो. मजिवुर रहमानले उनीहरुलाई उक्त सहयोग हस्तान्तरण गरे।
कार्यक्रममा समग्रका कार्यकारी निर्देशक देवराज पोखरेल, भीएसओ नेपालका प्रतिनिधि मनिषा भण्डारी, वदेवरसाईन ५ का वडा सदस्य रूपनीदेवी राम , मनोविमर्शकर्ता कविता चौधरी, समग्र जन उत्थान केन्द्रका स्थानीय सहजकर्ता लोकेन्द्रप्रसाद यादव, ओमप्रकाश ठाकुर लगायतको उपस्थिति थियो ।
समग्र जन उत्थान केन्द्र लहानले संचालन गरेको समग्र लैङ्गिक उत्तरदायी न्यायमा पहुँच सुदृढीकरण परियोजना (सहज) अन्तर्गत आर्थिक सशक्तीकरण तथा आय–आर्जन क्रियाकलापका लागि उक्त सहयोग हस्तान्तरण गरिएको हो । युके एडको आर्थिक सहयोग तथा भीएसओ नेपाल र ईन्टरनेशनल अलर्टको साझेदारीमा परियोजना संचालनमा छ।