राजविराज, १५ साउन। सप्तरीमा विहिवार दुई जना कोरोना संक्रमित थपिएका छन् ।
विराटनगर स्थित कोशी अस्पताल प्रयोगशालामा गरिएको परिक्षणका क्रममा खडक नगरपालिका १० का ५६ वर्षिय पुरुष र २२ वर्षिय महिलाको रिपोर्ट पोजेटिभ आएको छ । कोशी अस्पतालको साउन १२ गतेको रिपोर्ट ढिलो गरी प्राप्त भएको हो । यो सँगै सप्तरीमा संक्रमितको संख्या ४६६ पुगेको छ ।
यस अघि नै संक्रमितको संख्या ४६६ पुगे पनि त्यस मध्ये पहिला नै गणना भएका २ जनालाई दोस्रो पटक कोरोना संक्रमण भएको पाईएपछि जम्मा संख्या ४६४ कायम गरिएको थियो । पछिल्लो पटक दुई जनाको रिपोर्ट पोजेटिभ आएपछि जम्मा संख्या ४६६ पुगेको जिल्ला स्वास्थ्य कार्यालय सप्तरीका निमित्त प्रमुख दुनियाँलाल यादवले वताए ।
यता, गजेन्द्रनारायण सिंह अस्पतालमा संचालनमा रहेको प्रयोगशालाको रिपोर्ट आउन वाँकी छ । गत मंगलवार दिउँसो सार्वजनिक भएपछि अर्को रिपोर्ट आएको छैन । मंगलवारको रिपोर्टमा शम्भुनाथ नगरपालिका ३ का ३६ वर्षिय पुरुष, वोदेवरसाईन नगरपालिका ५ का २४ वर्षिय पुरुष, वडा नं. ८ का १८ र २६ वर्षिय पुरुषमा कोरोना संक्रमण देखिएको थियो ।
गजेन्द्रनारायण सिंह अस्पतालका निमित्त मेडिकल सुपरिटेन्डेन्ट रणजीकुमार झाले आज साँझसम्ममा एक चरणको रिपोर्ट निकाल्ने गरी परिक्षण भईरहेको वताए । करिव साढे ३ सय ब्यक्तिको स्वाव एकै पटक परिक्षण भईरहेको जानकारी दिएका झाले सस्पेक्ट देखिएका केसलाई दोहोर्याएर परिक्षण गर्नु परेका कारण रिपोर्ट सार्वजनिक गर्न ढिलो भएको वताए ।
‘कामको रफ्तारमा कुनै कमी भएको होईन, रिपोर्ट आउन मात्रै विलम्व भए जस्तो भएको हो’ उनले भने–‘कतिपय केसलाई दोहोर्याएर परिक्षण गर्नु परेको छ । आज एक चरणको रिपोर्ट आउने गरी हामी काम गरिरहेका छौं ।’