राजविराज, २२ वैशाख । सप्तरीको राजविराज नगरपालिकामा वन्दाबन्दीको बेला पनि जनप्रतिनिधिले सरसफाइमा ध्यान नदिँदा दुर्गन्ध फैलिएको छ । कोरोना भाइरसको संक्रमण नियन्त्रण तथा रोकथामका निम्ति यतिवेला नगर क्षेत्रलाई स्वच्छ र सफा राख्न जनप्रतिनिधिले सरसफाईमा गम्भिर भएर कार्य गर्नुपर्ने हो । तर, जनप्रतिनिधिको गैरजिम्मेवारीले सरसफाईको नाममा पनि नगरको मुटु नै दुर्गन्धित बनेपछि नगरवासी आक्रोशित बनेका छन ।
वडा नम्वर ७ स्थित नगरपालिका कार्यालयको पछाडी नै नाला सफा गरेर चौबाटोमै थुपारेका कारण सो क्षेत्र नै दुर्गन्ध बनेपछि उनीहरु आक्रोशित बनेका हुन् । ‘यो पनि जिम्मेवारीपूर्ण काम हो त?, नालाबाट फोहोर निकाल्न लगाएर सडकमै थुपारेका छन्’ पप्पुकुमार यादवले भने–‘यहाँका केही नगरवासीको बदमासी पनि उति नै छ, केहीले नालामै शौचालयको फोहोर निकासा गरेको देखिन्छ । र जनप्रतिनिधिले त्यहि फोहोर नालाबाट निकाल्न लगाएर सडकमै थुपारेपछि अहिले नगरको मुटु नै दुर्गन्धित बनेको छ ।’
यस्तो कार्यले मानव स्वास्थ्यमा प्रतिकुल असर पर्ने भएकाले जनप्रतिनिधिले गम्भिर भएर अघि बढ्नुपर्ने उनले बताए । ‘नगरवासीले गलत गर्छ भने उनीहरुलाई पनि कानूनी दायरामा ल्याउनु जरुरी छ’ उनले थपे–‘तर जनप्रतिनिधिले ठोस कार्य गर्न चाहेकै छैन्, देखाउने र प्रचारवासीबाहेकका के काम गरेको छ र?’
नागरिक सञ्जाल सप्तरीका संस्थापक अध्यक्ष सुखराम यादवले कोरोना भाइरस विश्व महामारी बनेकोले सर्वसाधरणहरु त्रसित रहेको बेला मानव स्वास्थ्यसँग जोडिएका विषयहरुमा जनप्रतिनिधिलाई गम्भिर हुनुपर्नेमा जोड दिए । ‘यो घोर सामाजिक अपराध हो, यसरी नाला सफा गराउदा नालाबाट निस्किने फोहोरहरु व्यवस्थित गर्नुपर्ने थियो’ उनले भने–‘तर,दुर्गन्ध फैलिएको अवस्था हेर्दा लाग्छ जनप्रतिनिधिहरु नगरवासीको स्वास्थ्यप्रति चिन्तित नै छैन् ।’
उता, वडा नम्वर ७ का अध्यक्ष मागीलाल नाइले सो स्थानमा नाला जाम भएपछि सफा गराउने क्रममा फोहोर निकाल्न लगाएको स्वीकार गरे । ‘सफा गराउँदा नालाबाट फोहोर निकालिएकै हो, तर सो स्थानमा शौचालयको फोहोर निकासा गरेको विषयमा जानकारी छैन्,’ उनले थपे ।