• |
समाचार भिडियो अडियो विविध हाम्रो बारेमा

राष्ट्रिय

मर्यादित पत्रकारिताका नाममा मिडियामा नियन्त्रण अमान्यः पोखरेल

मर्यादित पत्रकारिताका नाममा मिडियामा नियन्त्रण अमान्यः पोखरेल

काठमाण्डौ, ८ जेठ । नेपाल पत्रकार महासंघका कार्यबाहक अध्यक्ष विपुल पोखरेलले मर्यादित पत्रकारिताका नाममा मिडियामा हुने कुनै पनि खालको नियन्त्रण मान्य नहुने बताएका छन् ।
सरकारको नीति तथा कार्यक्रममा मिडियालाई मर्यादित र जिम्मेवार बनाइने उल्लेख गरिएकोमा नेपाल पत्रकार महासंघमा आज आयोजित कार्यक्रममा कार्यबाहक अध्यक्ष पोखरेलले त्यसलाई प्रष्ट पार्न सरकारलाई आग्रह गरे । ‘सहजीकरणका लागि उल्लेख गरिएको हो भने ठीक छ, उनले, तर नियन्त्रण गर्न आशय भए मान्य हुँदैन ।’
महासंघका निवर्तमान अध्यक्ष डा.महेन्द्र विष्टले कानूनी रुपमै सञ्चारमाध्यममाथि नियन्त्रण गर्ने प्रवृति विश्वव्यपी रुपमा बढिरहेको भन्दै नेपालमा त्यसको सम्भावना बढिरहेको बताए । संसदबाट समेत प्रेसलाई नियन्त्रण हुन गर्न सक्ने कानून बन्ने सम्भावना रहेको भन्दै उनले त्यसप्रति सचेत रहन आवश्यक रहेको धारणा व्यक्त गरे ।
पत्रकार महासंघका सल्लाहकार तिर्थ कोइरालाले मिडियामा पेशागत असुरक्षा र स्वनियन्त्रण रहेको भन्दै पत्रकारितामा क्षेत्रमा रहेका कमजोरीलाई न्यूनीकरण गर्न पत्रकारलाई पनि सचेत गराउनुपर्ने बताए ।
न्यूनतम पारिश्रमिक निर्धारण समितिका अध्यक्ष गंगाधर पराजुलीले मिडियामा पेशागत असुरक्षा भएपनि समितिमा उजुरी भने कम आउने गरेको बताए । राष्ट्रिय मानव अधिकार आयोगका सूचना अधिकारी डा. टिकाराम पोखरेलले मिडिया राष्ट्रिय मानव अधिकार आयोगको सहयोगीका रुपमा रहेको भन्दै मिडियामा आएपछि नै धेरै जसो घटनाको अनुसन्धान गर्ने बताए ।
प्रेस काउन्सिलका सूचना अधिकारी दिपक खनालले आचासंहिता उल्लङ्घनका घटनाहरु बढिरहेको भन्दै सबैभन्दा बढि उजुरी अनलाइनबारे परेको चर्चा गरे । अहिलेसम्म एक सय उजुरी परेको जानकारी दिँदै उनले त्यस मध्ये ६० वटा अनलाइन सम्बन्धी भएको बताए । सूचना अधिकारी खनालले कतिपय अवस्थामा पत्रकारहरुले जानेरै आचारसंहिता उल्लङ्घन गर्ने गरेको जानकारी दिए ।