राजविराज, २३ पुस । नयाँ शक्ति पार्टी नेपालका केन्द्रीय संयोजक डा. बाबुराम भट्टराईले नेकपा एमाले महेन्द्रकालीन राष्ट्रवादको हौवा पिटेर संसद अवरुद्ध गर्नेतर्फ लागेको भन्दै यसले गर्दा समस्या समाधानमा बाधा भइरहेको कुरा बताएका छन् ।
शनिबार साँझ राजविराजमा स्थानीय सञ्चारकर्मीहरुसित कुराकानी गर्दै उनले यस्तो कुरा बताएका हुन् । ‘अहिले संविधान संशोधन गरी मुलुकलाई शिघ्र निकास दिनु जरुरी छ’ उनले भने ‘तर, एमाले संसद अबरुद्ध गरेर समस्या लम्क्याउनेतर्फ लागेको छ ।’
विभिन्न जातजातीको पुरानो थातथलोको पहिचानसहित भाषिक र ऐतिहासिक विषय वस्तुलाई पनि संघीयतामा समेट्नु आवश्यक रहेको भन्दै नेता भट्टराईले पहिले संविधान सभाको भावनालाई काँग्रेस, एमालेले पुरानो सोचबाट ग्रस्त भई अहिले त्यसलाई बंग्याएको कारणले समस्या थपिएको टिप्पणी गरे ।
उनले भने ‘संघीयतामा नमिलेको कुरालाई मिलाएर अघि बढ्न अब ढिलाई गर्नु हुन्न ।’ सुनसरी मोरंगका थारु बाहुल्य क्षेत्रलाई २ नम्बर प्रदेशमा, पश्चिमका थारु बाहुल्य क्षेत्रलाई ५ नम्बर प्रदेशमा, बीचको लुम्बिनी–राप्तीका मगर बाहुल्य क्षेत्रलाई ४ नम्बर प्रदेशमा राखे निकास निस्कने उनको भनाई थियो ।
तपाईको पार्टी र संघीय समाजवादी फोरमबीच एकीकरणको चर्चा छ नि ? भनि राखिएको जिज्ञासामा उनले एकीकरण भन्दा पनि आफुहरुको ध्यान संविधान संशोधनतर्फ केन्द्रीत रहेको बताए । ‘फोरम मात्र होइन हाम्रो तमलोपा, सद्भावना लगायतका मधेशवादी दलहरुसित पनि कुरा हुँदैछ’ उनले भने ‘संविधान संशोधन पछि परिवर्तनकारी शक्ति बीच एकिकरणतिर लाग्ने छौं ।’
